ពិធីគោរពវិញ្ញាណក្ខន្ធ សម្តេចអគ្គមហាធម្មពោធិសាល ជា ស៊ីម នៅខេត្តស្ទឹងត្រែង

ខេត្តស្ទឹងត្រែង ៖ ព្រឹកថ្ងៃទី ១៥ ខែ មិថុនា ឆ្នាំ២០១៥នេះ នៅសាលាខេត្តស្ទឹងត្រែង បានរៀបចំប្រារព្ធពិធីគោរព ដួងវិញ្ញាណក្ខន្ធសព សម្តេចអគ្គមហាធម្មពោធិសាល ជា ស៊ីម អតីតប្រធានព្រឹទ្ធសភា និងជាប្រធានគណបក្សប្រជាជនកម្ពុជា ក្រោមអធិបតីភាព ឯកឧត្តម កុល សំអុល ប្រធានគណៈកម្មាធិការគណបក្សប្រជាជនកម្ពុជាខេត្តស្ទឹងត្រែង និងជាអភិបាលខេត្តស្ទឹងត្រែង ឯកឧត្តម ញ៉ែម សាមន ប្រធានក្រុមប្រឹក្សាខេត្ត ព្រមទាំងថ្នាក់ដឹកនាំកងកំលំាងប្រដាប់អាវុធទំាងបីប្រភេទ ថ្នាក់ដឹកនំាក្រុង ស្រុក ទំាង៥ ថា្នក់ដឹកនំា មន្ត្រីរាជការ មន្ទីរ អង្គភាពជុំ វិញខេត្ត ប្រជាពលរដ្ឋ យាយជី តាជី លោកគ្រូអ្នកគ្រូ សិស្សានុសិស្ស ចំនួនជាង១២០០នាក់ចូលរួមផងដែរ។

ឯកឧត្តម កុល សំអុល អភិបាលខេត្តស្ទឹងត្រែង បានអានសារលិខតចូលរួមរំលែកទុក្ខដែលមានខ្លឹមសារថាៈ ក្នុងនាមក្រុមប្រឹក្សាខេត្ត គណៈអភិបាលខេត្ត ថ្នាក់ដឹកនាំគ្រប់លំដាប់ថ្នាក់ មន្រ្ដីរាជការ នៃរដ្ឋបាលខេត្ត កងកម្លាំងប្រដាប់អាវុធគ្រប់ប្រភេទ ប្រជាពលរដ្ឋក្នុងខេត្តស្ទឹងត្រែងទាំងអស់ មានសេចក្ដីតក់ស្លុតរន្ធត់ចិត្តយ៉ាងក្រៃលែង រកអ្វីប្រៀបផ្ទឹមពុំបានឡើយ ចំពោះការទទួលមរណៈភាពរបស់សម្ដេចអគ្គមហាធម្មពោធិសាល ជា ស៊ឹម ប្រធានព្រឹទ្ធសភានៃព្រះរាជាណាចក្រកម្ពុជា និងជាប្រធានគណបក្សប្រជាជនកម្ពុជា នាថ្ងៃច័ន្ទ ៧រោជ ខែជេដ្ឋឆ្នាំមមែ សប្ដស័ក ពុទ្ធសករាជ ២៥៥៩ ត្រូវនិងថ្ងៃទី០៨ ខែមិថុនាឆ្នាំ២០១៥ វេលាម៉ោង ១៥,៤៥នាទីក្នុងជន្មាយុ៨៣ឆ្នាំដោយរោគាពាធ ។ ក្នុងក្ដីអាឡោះអាល័យដ៏សែនសោកសង្រេង ខ្សឹមខ្សួលរំជួលចិត្តឥតឧបមានេះ យើងខ្ញុំទាំងអស់គ្នា សុំគោរពចូលរួមរំលែកទុក្ខប្រកបដោយក្ដីក្ដុកក្ដួលសោកស្តាយស្រណោះអាឡោះអាល័យជាទីបំផុត ចំពោះការបាត់បង់ សម្តេចប្រធានព្រឹទ្ធសភានៃព្រះរាជាណាចក្រ កម្ពុជា និងជាប្រធានគណបក្សប្រជាជនកម្ពុជា ព្រមទាំងជាមេគ្រួសារ បិតា ជីតា ជីតាទួត ជាទីគោរពស្រលាញ់ប្រកប ដោយព្រហ្មវិហាធម៌ និងទឹកចិត្តសណ្ដោសប្រណីដ៏ថ្លៃថ្លាគ្មានអ្វីកាត់ថ្លៃបាន ។ សម្ដេចអគ្គមហាធម្មពោធិសាល ជា ស៊ឹម គឺជាវីរយុទ្ធជនដ៏អង់អាចក្លាហានមួយរូប ដែលស្ទើតែមួយជីវិតបានប្រយុទ្ឋតស៊ូមិនស្តាយជីវិត លះបង់កម្លាំងកាយចិត្ត ប្រាជ្ញាស្មារតី ដើម្បីតែបុព្វហេតុរំដោះជាតិមាតុភូមិ រួចផុតពីរបបប្រល័យពូជសាសន៏ បញ្ចប់សង្រ្គាមដ៏រ៉ាំរ៉ៃ បង្កើតបាននូវសុខសន្តិភាពពេញលេញបរិបូណ៏ ហើយបន្តដឹកនាំយ៉ាងសកម្មខ្លាំងក្លា ក្នុងកិច្ចដំណើរការស្ដារ កសាង និងអភិវឌ្ឍន៍ប្រទេសជាតិឲ្យមានការរីកចម្រើនលើគ្រប់វិស័យដូចបច្ចប្បន្ននេះ ។ សម្ដេចប្រធានព្រឹទ្ធសភា ក៏ជាវីរជនស្នេហាជាតិដ៏ឆ្នើម ប្រកបដោយគុណធម៌ សម្ដេចបានបំពេញបេសកកម្មដ៏ថ្លៃថ្លាបម្រើជាតិ និងប្រជាជនកម្ពុជា ដឹកនាំស្ថាប័ននីតិប្បញ្ញត្តិកំពូលរបស់ជាតិ ទទួលបានជោគជ័យយ៉ាងក្រៃលែង ពីមួយអាណត្តិទៅមួយអាណត្តិ ក្នុងដំណើរការពង្រឹងនីតិរដ្ឋ លិទ្ធិប្រជាធិបតេយ្យ សេរីពហុបក្ស ការគោរពសិទ្ធិមនុស្ស ការកែទម្រង់រដ្ឋស៊ីជម្រៅលើគ្រប់វិស័យ និងការអភិវឌ្ឍន៍កសាងជាតិមាតុភូមិយ៉ាងពិតប្រាកដ ។ ក្នុងឋានៈជាប្រធាន សម្តេចបានដឹកនាំគណបក្សប្រជាជនកម្ពុជា ដែលជាគណបក្សប្រសូត្រចេញពីប្រជាជន ដើម្បីប្រជាជន និងបំរើប្រជាជន ទទួលបាននូវការស្រឡាញ់បោះឆ្នោតគាំទ្រពីមហាជន ពីប្រជាជនកម្ពុជាយ៉ាងច្រើនលើសលុបគ្រប់អាណត្តិ គ្រប់នីតិកាលទាំងអស់ ។ មរណៈភាពរបស់សម្ដេចប្រធានព្រឹទ្ធសភា គឺជាការបាត់បង់ឥស្សរជនដ៏ឆ្នើមរបស់ជាតិ នៃប្រជាជនព្រះរាជាណាចក្រកម្ពុជាទាំងមូល ។ យើងខ្ញុំទាំងអស់គ្នា សូមចង់ចាំទុកក្នុងក្រអៅបេះដូងជាប់ជានិច្ចនូវគុណូបក្ការៈដ៏ថ្លៃថ្លាមហាពលិកម្មដ៏ធំធេង និងទឹកចិត្តស្នេហាជាតិដ៏ស្មោះស្ម័គ្ររបស់សម្ដេចប្រធានព្រឹទ្ធសភា ជានិច្ចនិរន្តលុះអវសាន្ត ។ ក្នុងឱកាសដ៏សែនក្រៀមក្រំនេះ តាងនាមក្រុមប្រឹក្សាខេត្ត គណៈអភិបាលខេត្ត ថ្នាក់ដឹកនាំគ្រប់លំដាប់ថ្នាក់ មន្រ្ដីរាជការនៃរដ្ឋបាលខេត្ត កងកម្លាំងប្រដាប់អាវុធគ្រប់ប្រភេទ ប្រជាពលរដ្ឋទូទាំងខេត្តស្ទឹងត្រែង សូមលំឱនកាយ ឧទ្ទិសនូវកុសលផលបុណ្យ អានិសង្ឃទាំងឡាយ ព្រមទាំងវត្ថុសាកសិទ្ធិក្នុងលោក គុណព្រះពុទ្ធ ព្រះធម៌ ព្រះសង្ឃសូមទ្រទ្រង់វិញ្ញាណក្ខន្ធរបស់ សម្ដេចអគ្គមហាធម្មពោធិសាល ជា ស៊ឹម បានចាប់បដិសន្ធិ ក្នុងសុគតិភពកុំបីឃ្លាងឃ្លាតឡើយ ។

តមកក៏មានការបង្សុកូល ឧទ្ទិសកុសលជូនចំពោះដួងវិញ្ញាណក្ខន្ធសម្តេចអគ្គមហាធម្មពោធិសាល ជា សីុម អតីតប្រធានព្រទ្ធសភា និងជាប្រធានគណបក្សប្រជាជនកម្ពុជា និងធ្វើការស្មឹងសម្មាតដើម្បីគោរពដល់វិញ្ញាណក្ខន្ធ ដែលប្រារព្ធឡើងនៅសាលាខេត្តស្ទឹងត្រែង។

គេហទំព័ររបស់គណបក្សតាមបណ្តារាជធានី ខេត្ត